Nikanarsagaalluni qaninniarfigitinnerit pillugit AK misissuisoq

Sulinerup nalaani killissat qaangerlugu qaninniarfigitinnikuuit allatigulluunniit kinguaassiutinut tunngasumik kanngutsaatsuliorfigitinnikuuit? Ilaatigut apeqqutit taamakkuupput Atorfillit Kattuffiata akissutiserusutai taakkuupput. Misissuineq maanna ilaasortanut 1.300-nut nassiunneqarsimalerpoq

Ukiuni kingullerni killissamik qaangiilluni qaninniarnerit kanngutsaatsuliornerillu nunarsuaq tamakkerlugu eqqartugaaqaat; Ilaatigut #Meetoo aqqutigalugu.

Nunatsinnilu sammisaq tusagassiutitigut 2020-mi eqqartugaanikooqaaq, tassani inuit pissaanillit killissamik qaangiillutik qaninngoortarnerat minnerunngitsumillu suliffeqarfinni qaninngoortarnerit sammineqarnikuullutik.

Sammisaq pillugu saaffiginnittartut amerliartornikuupput. Saaffiginnittut tassaapput ilaasortat, tusagassiortut allallu. Taakkuusinnaasarpullu killissamik qaangiivigineqarsimasut namminerluunniit killissamik qaangiisimasutut naammagittaalliuutigineqarsimasut.

Sammisamut soqutiginninnerup annerulersimanerata, minnerunngitsumillu ammasumik oqallisaalernerata kinguneraa AK-p sammisap pillugu ilisimasanik pisariaqartitsilernera, Dina Olsen, AK-mi siulittaasoq, naliliivoq.

– Killissamik qaangiilluni qaninniartoqartarneranik ilaasortat misigisaat misilittagaallu, kiisalu ajornartorsiutip qanoq iliuuseqarfigineqartarnera, paaserusuppagut. Misissuinikkut ilaasortat killissamik qaangiiffigitissimasut namminnerluunniit qaangiisimasut pitsaanerpaamik ikiorneqarnissaannik siunnersorsinnaalissavagut, taamaaliornikkullu killissamik qaangiisarnernik unitsitseqataasinnaalluta, Dina Osen oqarpoq.

Atorfillit Kattuffiat 1.300-nik ilaasortaqarpoq, taakkunanilu amerlanerpaat kommunini Naminersorlutillu Oqartussani atorfeqartuupput. Taamaammat misissuinerup inernera ajornartorsiutip qanoq annertutigineqarnik tikkuussisinnaasoq Dina Olsen isumaqarpoq.

– Sulisitsisunut saaffiginninnissatsinnut toqqammavissaqarlualissaagut, minnerunngitsumillu ajornartorsiutip unitsinnissaanut pinaveersaartinnissaanullu siunnersuuteqarsinnaalissalluta, Dina Olsen oqarpoq.

– Neriuppunga misissuinermi peqataasoqarluassasoq. Tamattami akisussaaffimmik tiguseqataagutta siunissami killissamik qaangiinissaraluit pinaveersaartissinnaavagut, taamatullu suliffik toqqissisimanarnerulersissinnaallugu.

Misissuinermi peqataasut kinaassusaat isertugaassapput, taamaammallu kommunini, illoqarfinni suliffeqarfinniluunniiit aalajangersimasuni ajornartorsiutip atuunnerunera takuneqarsinnaanavianngilaq.

Misissuineq 2021-mi januarip ulliusa sisamaat ilanngullugu pissaaq.