Sulisut peqatigiiffiat Den Grønlandske Tjenestemandsforening af 1917-mi pilersinneqarpoq. 1992-imi nutaamik taaguteqalerpoq Atorfillit Kattuffiat (AK). Ukiut 100-it sinnerlugit atuuffeqarsimanermigut kattuffik taamaasilluni suliffeqarnermi inuiaqatigiinnilu sunniuteqarsimasoq, sulilumi taamatut inissisimalluni.
Ukiut qulit kingulliit ingerlaneranni AK´-p ilaasortai 400-ut missaannik amerlipput, taamaasilluni 2023-mi ilaasortai 1200-mit missaanniillutik, taakkulu sulianut aalajangersimasunut qulinut agguataarput.
AK´p ilaasortai Namminersorlutik Oqartussani, ingerlatseqatigiiffinni Namminersorlutik Oqartussat tamakkiisumik pigisaanni, kommuneni kiisalu Naalagaaffimmi atorfeqarput. AK´-p ilaasortai suliffeqarfinni 26-ni nuna tamakkerlugu inissisimasuni sulipput.
Taaneqartut saniatigut AK´-mut ilaasortaapput soraarnerussutisiaqalersimasut AK´-mut suli attuumassuteqarusuttut kiisalu ilinniartut.
AK tassaavoq kattuffik politikkikkut arlaannaannulluunniit pituttorsimanngitsoq. Siunertarivaa ilaasortat aningaasaqarnikkut suliffeqarnikkullu soqutigisaasa isumaginissaat, peqatigiinnerup nukittorsarnissaa, kiisalu ilaasortat suliaqarfigisaasa ineriartortitseqataaffiginissaat. Taamaasilluni akissarsianut sulinermilu atugassarititaasunut tunngasut kisiisa AK´-p suliaqarfiginngilai, allalli aamma ilaasortat ulluinnarni sulinerannut siunissamilu suliffeqanermut attuumassuteqaannarnissaannut sunniuteqarsinnaasut pillugit kattuffiit naalakkersuinikkullu suliaqartut aamma attaveqarfigisarlugit.
Ilaasortat saniatigut AK-p kattuffittut toqqammavigai siulersuisut, fællestillidsmandit kiisalu sulisut sinnissaat.
AK ukiut sisamakkaarlugit ataatsimeersuartarpoq.
AK´-p ilaasortaaffigaa Qallunaat Nunaanni sulisartut peqatigiiffiisa kattuffissuat Den danske Fagbevægelsens Hovedorganisation (FH), Fagbevægelsens Hovedorganisation.
FH´-p ataatsimeersuarnerani AK ataatsimik nalilimmik taasisinnaatitaavoq. Taasineq taanna AK´-p siulittaasuaniittuaannarpoq.
FH´-mik suleqateqarnikkut AK´-mut ilaasortai ilaasortatut iluaqutissarsisinneqartarput, sulianilu ataasiakkaani pisariaqartillugu FH´-p allattoqarfia ikiortiserineqarsinnaalluni.
Suliffigissaaneq pillugu siunnersuisoqatigiit´-nni AK sinniisuutitaqarpoq.
Akiliunneqarluni angalasinnaanermut aningaasaateqarfimmi Den Fælles Ferierejsefond -imi AK sinniisuutitaqarpoq.
Akileraarusiinermik Aalajangiisartuni, Skatterådet, AK sinniisuutitaqarpoq.
Suliffeqarneq pillugu siunnersuisoqatigiinni / Isumaginninnermut, Suliffeqarnermut Nunamullu Namminermut tunngasunut Naalakkersuisqarfimmiittumi, AK sinniisuutitaqarpoq.
Qaammatit marlukkaarlugit ingerlanneqartartumut siunersioqatigiinnermut atatillugu AK´-ip kattuffiit allat naapeqatigisarpai. Peqatigiiffiit tassaapput ilinniagartuut Nunatsinni peqatigiiffiat Akademikernes Sammenslutning i Grønland (ASG), Ilinniartitsisut Kattuffiat (IMAK), Peqqissaasut Kattuffiat (PPK), Perorsaasut Kattuffiat (NPK) aamma Sulinermik Inuussutissarsiuteqartut Kattuffiat (SIK). Ataatsimiinnerni taakkunani sammineqararput soqutigisat ataatsimoorfiusut, kiisalu ataatsimoorluni saaffiginnissutit, soorlu Naalakkersuisunut, ingerlatinneqarsinnaasarlutik.
