Asasatsinnut PK-mi, ASG-mi AK-milu ilaasortaasunut Fælles Feriefond aqqutigalugu feriefrirejsernissamut periarfissallit.

Fælles Ferierejsefond siulersuisuini aalajangerneqarpoq 2025-miit angalanermut tapiissutit annikillineqarnissaat.

Aalajangiineq pivoq aningaasaateqarfiup aningaasaqarnerata eqqarsaatigineqarnissaa pissutigalugu, ukiuni pingasuni kingullerni ingammik Covid-19-ip Air Greenlandillu akiisa qaffannerisa kingunerisaannik aningaasaateqarfiup aningaasaataat annikillerujussuarsimammata. Taamaattumik aningaasaateqarfiup siulersuisuisa, aningaasaateqarfiup ingerlaannarnissaa qulakkeerniarlugu periarfissat misissortariaqarsimavaat tassungalu ilanngullugu sipaarniuteqarnissamut periarfissat misissortariaqarsimallugit. Ajoraluartumik tamanna isumaqarpoq, siunissami sulinngiffeqarnermi angalanerit tamakkiisumik matussuserneqarsinnaajunnaassasut, aningaasaateqarfiup malittarisassai naapertorlugit. Malugineqarsinnaavoq aningaasaateqarfiup siulersuisuisa tapiissutit ikilisarnissaat nangaassutigisimagaat, naatsorsuutigineqarnikuummammi mittarfiit nutaat bilitsit akiinik malunnaatilimmik appartitsissasut, tamannali ilimagineqarsinnaajunnaarpoq.

2025-mi januaarip aallaqqaataaniit aningaasaateqarfiup aqunneqarnera allanngortinneqassaaq, taamaalilluni ilaasortat ataasiakkaat namminneq angalatitsivik aqqutigalugu angalanissartik pilersaarusiortariaqarlugulu inniminnertariaqartussaavaat. Suli aningaasaateqarfiup allaffianut qinnuteqartoqartassaaq mailikkut uunga feriefonden@alg.gl, atorfimmullu uppernarsaatit nalinginnaasut ilanngutissapput. Illit ilaasortaaguit, taava billetsimik pisinissamut voucher nassiunneqassaaq. Voucherip nalinga apeqqutaassaaq sumi najugaqarnerit Air Greenlandillu najugaqarfinniit Københavnimut siumut utimullu billetsimut akigititai. Allaffissornermut aningaasanik atuinermut akiliut ilanngullugu aamma Feriefondep malittarisassai malillugit taamaatitsiinnarnissamut sillimmasiissut akianut ilanngutissaaq. Angalanermut nalinginnaasumik akiliutigineqartartut 75 procentii akiliutigineqassapput.

Aningaasaateqarfiup malittarisassaani § 2, imm. 7 naapertorlugu, Aningaasaateqarfiup siulersuisui aalajangerput 2025-mi januaarip aallaqqaataaniit atuutilersumik, sulinngiffeqarlutik angalasut billetsimut aningaasartuutaat matussusersinnaassasut taamaallaat, Air Greenlandip 2024-mi nalinginnaasumik akikinnerpaamik fleksibel bilitsit akiisa 75 %-iannik. Ilanngullugu takuuk malittarisassat § 2, imm. 6. 2025-mi bilitsit inniminnereersimasut aalajangiinermit sunnerneqassanngillat.

Ilaasortatut voucheri qanoq atussanerlugu nammineq aalajangersinnaavat, ilaatigut sumukarniarlutit, timmisartumi sorlermiissanerlutit taavalu billetti allanngortinneqarsinnaassanersoq imalunniit allanngortinneqarsinnaassannginnersoq. Angalanermi aningaasartuutit voucherimi aningaasat atugassat sinnerlugit amerlassuseqarpata, aningaasat sinneruttut nammineq akilissavatit. Angalanermi aningaasartuutit voucherimi aningaasat atugassat inorlugit amerlassuseqarpata, aningaasat sinneruttut tunniunneqassanngillat.

Fælles Ferierejse Fond siulersuisuisa ilaasortat tamaasa kajumissaarpaat sulinngiffeqarnermi angalanissanut piffissaalluarallartillugu inniminneeqqullugi, akikilliliissuteqartoqarsinnaanera aamma piffissami aalajangersimasumi bilitsinik akikinnerusunik pissarsisoqarsinnaanera eqqumaffigineqaqqullugit. Tamannami ilaasortat sulinngiffeqarnermi angalanissanut aningaasartuutaannik tamakkiisumik tamakkiingajattumilluunniit matussusiiuarnissaminnut qulakkeerutaasinnaammat. Siulersuisulli ilisimavaat ilaasortat ilaat siunissami Sulinngiffeqarlutik angalanernut atatillugu aningaasartuuteqangaatsiartarsinnaanissaat, tamannalu aningaasaateqarfiup siulersuisuisa ajuusaarutigaat, eqqaaneqartulli qulaani aamma bilitsit akiisa ukiuni kingullerni qaffarujussuarsimanerat eqqarsaatigeqquneqarpoq.

Tamakku pillugit apeqqutissaqaruit, siulersuisut allaffimmiullu akissuteqaateqarnissaminnut piareersimapput. Neriuppugut ilaasortat iliuutsivut paasiumaaraat, aammattaaq eqqaasariaqarparput siulersuisutut aningaasanut tunngatillugu akisussaaffeqartugut.