Atorfillit Kattuffiata aamma Aningaasaqarnermut Sulisoqarnermullu Aqutsisoqarfiup isumaqatigiissutissamut nutaamut, 1. april 2023 aallarnerfigalugu ukiuni 5-ini atuut-tussamut sinaakkutissatut isumaqatigiissut ulloq 3. juni 2024 atsiorpaat. Isumaqatigiissut funktionsoverenskomstimi siusinnerusukkut atuuttumi pineqartunut tamanut, inun-nik isumaginninnermi siunnersortinut sullissisunullu, nakorsat allattaannut kiisalu Isumaqatigiissummi Kigut-ip iluani pineqartut – klinikassistentinut, kigutigissaasunut kiisalu tandteknikerinut Namminersorlutik Oqartussani, kommunini taakkualuunniit ingerlatsiviini atorfeqartunut atuuppoq.
Akissarsiat pitsanngoriaatissaat katillutik 9,53 pct.-iupput, agguataagaallutillu tun-ngaviusumik akissarsiat qaffaataannut, erninermut atatillugu sulinngiffeqartarnerup pitsanngorsaavigineqarneranut, soraarninngornermi atugassarititaasunik pitsan-ngorsaanermut aammalu tapeqartitsisarnerup pisariillisarneranut. Isumaqatigiissut 1. april 2023 aallarnerfigalugu atuuttussaammat akissarsiat ulloq taanna aallarnerfi-galugu kingumoortumik iluarsineqassapput, tamannalu pissaaq isumaqatigiissut atuuttussanngortinneqariarpat.
Soraarnerussutisiassat assigiissuunissaat isumaqatigiinniarnermi anguneqarpoq, taamaalillutik sulisut isumaqatigiissummi pineqartut tamarmik sulisitsisup akiligaa-nik soraarnerussutisiassanut 10 pct.-imik tunineqarlutik. Taakku saniatigut nammi-neq akiliutissaq 5 pct.-iuvoq, taamaalilluni soraarnerussutisiassanut akiliutaasartoq tamarmiusoq maanna 15 pct.-inngorluni.
Isumaqatigiissutit Pillugit Ataatsimiititaliarsuup inassuteqaataa akuersaarlugu, isu-maqatigiissutip ilarujussua illua´tungeriit peqatigiillutik nutarterpaat, taamaalior-nikkut atuisussanut piuminarninngortillugu. Tapit arlaqartut ataatsimut katinneqar-put, aamma allat piffissap ingerlanerani atuuttussaajunnaarsinneqassapput – taa-maakkaluartorli sulisut arlaannaataluunniit tapit maanna pisartakkani annaassan-ngilai. Suliaqarfiit ataasiakkaat suliartoqquneqaratarsinnaanermut tapeqartinneqa-lerput, aamma suliartoqquneqaratarsinnaanermut pisussaaffik tamanut assigiimmik atuutissaaq, taamaalillutik sulisut ataasiakkaat kvartalimut nal.ak. 37-ini 52-iniluun-niit suliartoqquneqaratarsinnaanermut pisussaaffeqassallutik.
Tamakku saniatigut illua´tungeriit isumaqatigiipput pisortatut atorfilinnut immikkut isumaqatigiissuteqartoqarsinnaanera sunillu atugassaqartitsisoqarnissaa, kiisalu aamma sillimmasiissutitigut aaqqissuussinerup peqqinnerulernissamut siuarsaa-taasussamik ilaneqarsinnaanera piffissami aggersumi, tassa imaappoq tullianik isu-maqatigiinniarnissat akunneranni misissorneqassasut.
Isumaqatigiissutissamut sinaakkutissatut isumaqatigiissut AK-p ilaasortaanut maan-na taasissutigitinneqassaaq, taamaaliortoqareerpallu Naalakkersuisunit akuersissu-tigineqassaaq.