Asasakka Atorfillit Kattuffianni ilaasortat
Matumuuna Atorfillit Kattuffianni pisut pingaarnerit pillugit paasissutissilaassavassi.
Isumaqatigiinniarnerit
Atorfillit Kattuffiata Nunatsinni Pisortani atorfilinnut isumaqatigiissutai atuuttut maanna sivitsortumik Naalakkersuisut AK-llu isumaqatiginninniutigivaat sulilumi isumaqatigiittoqarani.
Isumaqatigiinniarnerit taama sivitsoruttoortiginerinut peqqutaasut arlaliupput. Siullermik isumaqatigiinniarnissat aallartinnissaat qaammatinik arlalinnik kinguaattoorfiunikuupput – illuatungeriinni peqquteqavissunik peqataasariaqavissunik peqataasinnaanngitsoqarsimanera pissutigalugu.
Maanna isumaqatigiinniarnerni isumaqatigiissutit arlallit kattunnissaat siunertaralugu isumaqatigiinniarnerit iingerlanneqarpoq. Taama pineq Isumaqatigiissutit Pillugit Ataatsimiititaliarsuup siornakkunni ingerlanikuusup innersuussutai malinniarlugit isumaqatigiinniarnerit ingerlanneqarput taamaaliornerlu peqqissaarullugu ingerlatassaammat piffissamik atuinerunermik kinguneqarluni.
Isumaqatigiissutit siorna 31. marts 2023 kingullermi isumaqatigiinniarnermi killigititartik qaangerpaat taamaakkaluartorli nutaamik isumaqatigiittoqarnissaata tungaanut atuuttarput.
Maanna isumaqatigiinniarnerit illua’tungeriinnit neriuuutigineqarpoq uani maj 2024-imi isumaqatigiissutigineqassasut – tamanna una nalunaarut iserfigalugu atuarneqarsinnaavoq: Atorfillit Kattuffiata Pisortanut isumaqatiginninniarneranut tunngatillugu paasissutissaq – Atorfillit Kattuffiat (ak.gl)
Isumaqatigiinniarnerit naammassineqariarpata tassa taava AK-mi ilaasortat taakkuninnga isumaqatigiissutinik atuisut isumaqatigiinniarnerup inernera akuerineraat akuersaannginneraalluunniit pillugit taasitinneqassapput amerlanerusunillu akuerineqassappat aniingaasat iluarsissutissat/qaffaatissaat tunniunneqarnissaannut suliaq Namminersorlutik Oqartussanit isumagineqalissaaq. Isumaqatigiissut soorunami utimut 1. april 2023-imiit atuutilersutut naatsorsorneqartussaavoq.
Ilaasortagut taakkuninnga isumaqatigiissutinik atuisut qujaffigiumavagut naammagittarlutik pimmata. Neriungaarpugut anguniarlugulumi piffissami ungasinngitsumi siunniussimasatsitut illua’tungerisagullu isumaqatigiissuteqarumaarluta.
Isumaqatigiinniarnerit allat
Maanna isumaqatiginninniarneq alla ingerlasoq tassaavoq suliffeqarfimmi Tusass’-imi teleteknikerit, centralteknikerit, liniemontørerit, aamma aspirantit pillugit isumaqatigiissutip ingerlanneqarnera. Taanna isumaqatigiissut maannamut marloqiusamik isumaqatigiissutaasimavoq, tassa ima paasillugu isumaqatigissutip aappaa Pisortanut isumaqatigiissutaalluni aappaalu Tusass’-imut, tassa suliffeqarfik namminersortutut inissisimaneranut ilassummik isumaqatigiissuteqarluni. Maanna siullermeerluni pisortanut isumaqatigiissutitaqarunnaarluni Tusasas’-imut – suliffeqarfik namminersortutut – isumaqatigiissut pisortaniit akuuffigineqanngitsumik isumaqatigiinniutigineqarluni. Neriuppugut taanna isumaqatigiinniarneq juni 2024-imi naammassiumaartoq. Isumaqatigiittoqarpat taanna aamma isumaqatigiissummik atuisunut tusarniutigineqaqqaassaaq akuerineqarsinnaappallu atuutilersinneqarumaarluni kingumut 1. april 2023-miit.
Isumaqatiginninniarnissat tullinnguuttut
Naalagaaffiup ataani Nunatsinni atorfeqartut, tassa isumaginninnermik siunnersortitut sullissisutullu (Pinerluttunik Isumaginnittoqarfik) atorfillit isumaqatiginnninniunneqarnissaat maanna AK-p Naalakkersuisullu isumaqatiginninniarnerat naammassippat ingerlanneqartussaavoq. Taanna siusinnerusukkut pisinnaasimanngilaq Naalagaaffiup Nunatsinni Pisortanut AK-p isumaqatiginniniarnera ingerlasoq naammassippat aatsaat isumaqatiginninniutaasinnaasoq piumasaqarnikuummata.
Taanna isumaqatiginninniarneq neriuppugut aasap ingerlanerani naammassiumaartoq. Naammassiguni aamma taanna kingumut 1. april 2023-mut uterluni aningaasarsiat iluarsiissutissaat/qaffaatissaat aaqqinneqartussaapput.
Atorfillit Kattuffiata siulittaasuata siulersuisunilu ilaasortap Nunatsinni piffinnut assigiinngitsunut piffissami maj juni 2024-mi angalanissaat
Atorfillit Kattuffianiit angalanissanut annermik tunngaviupput piffiit ilaanni suliffeqarfiit sinniisuerussimasut sinniisoqaqqilernissaat anguniarneqassammat, Atorfillit Kattuffiata siusinnerusukkut sulinermi atukkat pillugit – uippakajaarneq aammalu kinguaassiuutinut tunngatillugu suliffeqarfinni kanngutsaatsuliortarnerit – misissuisimanerata kingorna kommunit qullersaannik naapitsinerit kiisalu ilaasortanik naapitsinerit.
Illoqarfiit ornitassat:
Narsaq: 14. Maj – Inuilimi nal. 12-17.00 naapinneqarsinnaavugut.
Qaqortoq: 15. Maj – Hotel Qaqortumi nal. 13-17.00 naapinneqarsinnaavugut.
Ilulissat: 4. Juni – Hotel Ilulissat konferencelokale nal. 12-17.00 naapinneqarsinnaavugut.
Aasiaat: 5. Juni – Hotel Sømami nal. 12-17.00 naapinneqarsinnaavugut.
Sisimiut: 7. Juni – Hotel Sisimiuni nal. 12-17.00 naapinneqarsinnaavugut.
Maniitsoq: 11. Juni – Hotel Maniitsumi nal. 12-17.00 naapinneqarsinnaavugut.
Atorfillit Kattuffiata 2024-imi ataatsimeersuarnissaa
Atorfillit Kattuffiat ileqquusumik ukioq manna 2024-mi ataatsimeersuartussaavoq, tamannalu Atorfillit Kattuffiata malittarisassaani § 8 malillugu ingerlanneqartussaavoq. Malittarisassat uunga iserluni takuneqarsinnaapput: Atorfillit-Kattuffiata-malittarisassai-februar-2020.pdf (ak.gl)
Atorfillit Kattuffiata siulersuisuisa ulloq 25. April 2024 ataatsimiinnerminni aaliangiuppaat sapaatip akunnerani 43-mi ataatsimeersuarnerup pinissaa.
Maanna tungaanut piareersaatit aallartisarneqaleruttorput, soorlu sumi pinissaanut tunngatillugu piffinni assigiinngitsuni neqeroorusiortitsinerit il.il.
Ataatsimeersuarneq sioqqullugu ataatsimeersuaqataasunik sinniisuuneq pillugu pikkorissarneqaqqaassapput.
Aasarsiorluarnissassinnillu kissaallusi. Atorfillit Kattuffiat sinnerlugu
Inussiarnersumik inuulluaqqusillunga
Dina Olsen
Siulittaasoq