KNI-mi atorfillit Atorfillit Kattuffianni ilaasortaasut sinniisoqarsinnaalerput. Tamanna AK-p KNI-llu isumaqatigiissuteqarneratigut qulakkeerneqarpoq
KNI-mi atorfillit, atorfilittut ataasiakkaatut isumaqatigiissuteqartut AK-milu ilaasortaasut, sinniisoqarsinnaalerput. Tamanna pivoq; Atorfillit Kattuffiat KNI-lu sulisut sinniisoqalernissaat pillugu isumaqatigiissuteqarmata.
Sinniisoqarnerup pitsaaqutigivaa atorfillit nalornissuteqartillutik, toqqissisimanngitsillutik allatigulluunniit atorfeqarnermut tunngasunik apeqqutissaqartillutik sinniisumut saaffiginnissinnaassagamik. Sinniisoq siunnersuisinnaavoq; saaffiginnittulluunniit katuffimmiit eqqortumit ikiorneqarnissaannut qulakkeerinneqataalluni.
– Atorfilittut suliffimmi imaannaanngitsumik aqqusaagaqartilluni aqqutissiuipallassinnaasumik saaffissaqarnissaq isumaqartorujussuuvoq. Tassami aqqusaagaqartillunni kiserliulerneq pisinnaasarpoq immaqalu ajornartorsiutip piaartumik iliuuseqarfiginissaanut saaffissaqarsimanngikkaanni ajornartorsiutit alliartorneranik kinguneqarsinnaalluni, Dina Olsen oqarpoq, nangillunilu;
– Taamaammat nuannaaqaanga KNI-mi aqutsisut sinniisunut isumaqatigiissuteqarnissatsinnik kissaateqarluta saaffiginninnitsinni soqutiginnillutillu suleqatikkuminarsimammata. Taamaasilluta oqimaaqatigiimmik akisussaaqatigiilluta KNI-mi atorfillit suliffigisaminni avatangiiserissaartuunissaat minnerunngitsumillu toqqissisimanissaat suleqatigiissutigisinnaalerparput.
AK-p KNI-llu atorfillit sinniisoqarnissaannik isumaqatigiissutaat septembarip aallaqqaataani 2022-mi atuutilissaaq, sinniisunillu qinersisoqarsinnaalissalluni.
Dina Olsenip neriuutigaa aktielselskabit allat pisortanit pigineqartut sinniisoqarnissamut isumaqatigiissuteqalerusussasut.
– A/S-ini allani pisortanit pigineqartuni ataasiakkaatut isumaqatigiissuteqarlutik atorfillit sinniisoqarsinnaalernissaat anguniarlugu saaffiginninnissarput pilersaarutigaarput, Dina Olsen oqarpoq.
Paasissutissat:
KNI-mi atorfillit ataasiakkaatut isumaqatigiissutillik 40-t missaat AK-mi ilaasortaapput
AK 1300 missaannik ilaasortaqarpoq