Ukiut 12-ngajaat atorfinitsitaagallarneq atorfinivissimanertut naleqqiunneqassaaq. Tamanna Nunatsinni Eqqartuussiviup naqissuserpaa. Taamaammat atorfinitsikkallarneqannginnermi atorfigisimasamut utertsitsineq soraarsitsinertut isigineqassaaq. Eqqartuussiviup aalajangernera taamaasilluni AK-mut ilaasortap 250.000 koruunit nalinginik akissarsitinneqarlunilu ajunngitsorsiassinneqarneranik kinguneqarpoq
AK-p ilaasortaa, ukiorpassuarni ilaasortaasimasoq, 2007-mi allaffimmiuunermi nalaani Qeqqata Kommuniani sunngiffimmi inspektøritut atorfinitsikkallarneqarpoq.
Ukiut aqqaneq marlungajaat inspektøriugallareerluni sulisitsisuminit ilisimatinneqarpoq; atorfigigallagaa inuttassarsiorneqalersoq allamillu inuttalerneqassappat allaffimmiutut atorfimminut utertinneqassasoq.
AK-lli ilaasortaa ukiut aqqaneq marlungajaat atorfigigallakkani atorfivimmisut isigilersimavaa. Taamaammat Atorfillit Kattuffiannut ilaasortaaffigisaminut saaffiginnippoq suliaq nalilertikkusullugu.
Ukiut aqqaneq marluk atorfinikkallartitsisoqarsinnaanngilaq
Suliaq Atorfillit Kattuffiannit misissorneqarmat equngasoqarnera takuneqarsinnaasimasoq Dina Olsen, AK-mi siulittaasoq, oqaluttuarpoq.
– Ilaasortarput ukiut aqqaneq malungajaat inspektøriugallartinneqarsimasoq takusinnaavarput, taannalu AK-p isumaqatigiissutaa malillugu pisimasoq aamma takusinnaallutigu. Ukiunilu taakkunani sulisitsisup atorfik inuttassarsiortarsimanngikkaa aamma paasivarput. Ilaasortatta pissutsit allat atorfiup pineqartup inuttassarsiulerneranut patsisaasinnaasut oqaasiinnartigut oqaluttarai uagullu uppernartutut nalilerpagut, Dina Olsen oqaluttuarpoq, nangillunilu;
– Ukiut taamak amerlatigisut atorfeqartitaagallarsinnaagaanni taava atorfeqartut atorfimmut naleqquttuusimassaaq, taamaammat sulisitsiup ilaasortarput allaffimiumiit inspektørimut qaffatsissimasinnaagaluaraa isumaqarpugut. Sulisitsisorli atorfik inuttassarsiorniarlugu aalajangiussimavaa, qinnuteqartussallu aalajangersimasumik ilinniagaqarnissaannik piumasaqaatitalerlugu. Ilaasortatta ilinniagaq piumasaqaataasoq piginngimmagu qinnuteqaraluaruni atorfinittussatut piukkunnartutut nalilerneqarnavianngitsoq nalilerparput. Taamaammat atorfiup inuttassarsiorneqalernera ilaasortatsinnik, sulisitsisup naliliinerinnaa tunngavigalugu, soraarsitsinertut nalilerparput, tassami ilaasortatta inuttut qanoq issusaa atorfilittulluunniit piginnaasai soraarsitsinermi tunngaviunnginnamik.
Taamaariarmat Atorfillit Kattuffiat aalajangerpoq; suliaq eqqartuussivimmi suliassanngortinniarlugu. Taamaaliornermi AK-p piumasaraa; sulisitsisut aamma atorfillit akornanni Inatsit malillugu qaammatini sisamani ilaasortaq akissarsiaqartinneqassasoq qaammatillu sisamat nalinginik ajunngitsorsiassaqartinneqassasoq.
Suliaq Nunatta Eqqartuussivianut septembarimi 2020-mi suliassanngortinneqarpoq februarimilu 2022-mi AK ilaasortarlu isumaqatigineqarlutik aalajangiiffigineqarluni. AK-p siulittaasuata aalajangiineq nuannaarutigaa.
– Soorunami Nunatta Eqqartuussivianit ilalerneqarnerput nuannaarutigaarput. Ukiorpassuarni atorfinitsikkallarneqarneq kiisalu suliamut tunngasut allat isigissagaanni naliliinikuuvugut; ilaasortarput atorfinivissimasoq eqqunngitsumillu tunngavilimmik soraarsinneqarsimasoq. Tamannalu eqqartuussivimmit isumaqatigineqarpoq.
Eqqartuussissuserisoq Marie Louise Frederiksenip suliaq AK ilaasortarlu sinnerlugit suliarinikuuaa. AK-p ilaasortaata kinaassutsini isertuukkusussimavaa.