Atorfillit Kattuffiat (AK) Aningaasaqarnermut Sulisoqarnermullu Aqutsisoqarfik illuatungeralugu isumaqatigiissutigaat AK-p isumaqatigiissutaanik atuisut meerartaarsimalluni sulinngiffeqarnermi tamakkiisumik akissarsiaqartalissasut. AK-p siulittaasuata, Dina Olsenip, tamanna nuannaarutigaa ASA-llu isumaqatigiissummi matumani isumaqatiginninniarnissaq 2023-imi pisussaq utaqqinngikkaluarlugu iliuuseqarsimammat nersualaarlugu
Januaarip aallaqqaataa 2022 aallarnerfigalugu AK-p isumaqatigiissutaannik atuisut meerartaarnermut atatillugu sulinngiffeqarnermi tamakkiisumik akissarsiaqartussanngorput.
2020-mi januaarimi naartunermi, erninermi meeravissiartaarnermilu sulinngiffeqartarneq pillugu inatsit nutaanngormat angajoqqaat sulinngiffeqartarnerat sapaatit akunnerinik sisaminik sivitsorneqarpoq. Inatsisip atuutilerneranittaaq naartusut erninnginnermi sulinngiffeqartarnerat sapaatit akunnerinik marlunnik sivitsorneqarpoq.
Inatsisip nutaap sulinngiffeqarnermik sivitsuineq, tassa erninnginnermi sapaatip akunnerinik marlunnik sivitsuineq kiisalu angajoqqaatut sulinngiffeqarsinnaanermik sapaatit akunnerinik sisamanik sivitsuineq, AK-p isumaqatigiisutaannik atuisunut ima kinguneqarpoq; inatsimmi sivitsuutaasut akissarsiaqarfiginagit ullormusiaqaatigiinnarsinnaanngoraluarpaat. Maannali taamaakkunnaarpoq; tassami meerartaarnermut atatillugu sulinngiffeqarnermi tamakkiisumik akissarsiaqarnissaat isumaqatigiissutigineqarpoq. Tamanna isumaqatigiinniarnerit nalinginnaasut 2023-mi pisussat sioqqullugit pivoq.
– Isumaqatigiissutitsinnik atuisut meerartaarnermut atatillugu sulinngiffeqarnermi tamakkiisumik akissarsiaqartussaalernerat nuannaarutigaara, Dina Olsen oqarpoq, nangillunilu;
– Angajoqqaanngortut aningaasaqarnikkut toqqissisimanerulernissaat qularinngilara, neriuutigaaralu angajoqqaanngortut aningaasanik eqqasuuteqaratik inuunertik nutaaq aallulluarsinnaalissagaat.
Namminersorlutik Oqartussat nersualaarneqarput
Inatsit nutaaq atuutilermat AK-p isumaqatigiissutai maanna atuuttut atsiorneqareernikuupput, taamaammallu inatsimmi sulinngiffeqarnermut sivitsuineq AK-p isumaqatigiissutaannik atuisunut aningaasarsiaqaataanikuunatik.
2021-mi aasaasoq ASA AK-mut attaveqarpoq; AK-p isumaqatigiinniarnerit nalinginnaasut utaqqeqqaanngikkaluarlugit AK-p isumaqatigiissutaanik atuisut meerartaarnermut atatillugu sulinngiffeqarnermi akissarsiaqarsinnaalernissaat isumaqatigiissutaasinnaanera periarfissiissutigalugu.
– ASA-p nammineerluni AK-mut periarfissiinerata suleqatigiilluarsinnaanerput takutippaa. Amerlasuutigut illuatungeriittarpugut, taamaakkaluartoq immitsinnut suleqatigiittut isigisinnaasarnissarput pikkoriffiginerusinnaavarput. Tassami soqutigisagut assigiipput. Tamattami atorfillit sulinermi atugarissaarnissaat kissaatigaarput, taamatullu suliffimmut tunniussilluarnissaat. Taamaammat ASA uani iliuuseqarmat nersualaarusuppara, Dina Olsen oqarpoq.