Upalungaarsimanermut pisortat indsatslederillu oqarasuaammik paarsinermut tapeqar¬nissaat pillugu suliaq eqqartuussivimmi Voldgiftrettenimi aalajangiiffigineqarmat Atorfillit Kattuffiat ajorsarpoq

All.: Dina Olsen, Siulittaasoq, Atorfillit Kattuffiat, mobil: 56 0265

Upalungaarsimasut, pisortat tulliisa, upalungaarsimasut pisortaannut tullersortit kiisalu indsatslederit AK-mut ilaasortaasut oqarasuaammik paarsinermut tapeqarsinnaanerat pillugu Atorfillit Kattuffiat (AK) aamma Namminersorlutik Oqartussat ukiuni arlaqalersuni isumaqatigiinngissute­qarsimapput.  Tamanna tunngavigalugu AK eqqartuussivimmut Voldgiftrettenimut suliassanngortitsivoq. Eqqartuussiviup Voldgiftrettenip suliaq qaammatip siuliata naanerani aala­jangiiffigaa.

Voldgiftretten naliliivoq taamak suliallit oqarasuaammik paarsinermut tapinik pisinnaa­titaanerannut naammattumik tunngavissaqanngitsoq, tamatumunngami pisinnaatitaaffik isumaqa­tigiissutit allassimaffiini erseqqissumik taaneqanngimmat. Voldgiftrettenip erseqqissaa­tigaa, taamak suliallit suliartoqquneqaratarsinnaanermut pisussaaffeqarnerat sulisorisat killeqan­ngivissumik sulisinneqartarnissaattut paasineqassanngitsoq. AK naliliivoq taamatut tunngavilersui­neq aalajangiinerup pingaaruteqartortarigaa.

Voldgiftrettenimi suliap taamatut inerneqarnera AK-mi soorunami pakatsissutigaarput. Tassami isummarput eqqortuusutut upperisimagatsigu sivisuumillu sorsuutigisimagatsigu. Isumaqatigiissutini, protokollatini,erseqqissumik allaqqavoq indsats-lederit upalungaarsimanermilu pisortat , atorfinitsitaanermi atugassarititaasut allat AK-p isumaqatigiissutaaniittut, funktionsoverenskomstimiittut, naapertorlugit atugassaqartitaasut. Tamanna tunngavigalugu AK isumaqartuarsimaavoq atorfinni pineqartuni atorfeqartut soorunami pigaartuunerminni tapisiaqarnissaat. Tamanna apeqqut pillugu Voldgiftrettenip allatut, aammali nalornisumik, apeqqummut tunngatillugu isummernera takuvarput.

Sulisut suliffimminni pingaartinneqanngitsutut misigisarnerat

”Naalakkersuisut isumaqatigiinniaqataasutut, isumaqatigiissutit il.il. imarisaannik sapinngisartik ta­maat killiliiniartuartarnerat sulisuusunut ajornartorsiutaasorujussuuvoq. Naalakkersuisut isumaqa­tigiinniaqataasutut sulisuusut sulinerannut sapinngisamik minnerpaamik akiliiumasarnerat takuju­arparput, tamannalu isumaqatigiinngissuteqartarnernik sulisitsisumillu tatiginninnginnermik nassa­taqartarpoq. Sulisuusut suliffimminni pingaartinneqanngitsutut misigisarnerat sulinerminni atugar­liornerannik suliffimminnillu nuannarinnigunnaarnerannik kinguneqartarpoq.”, taamak oqarpoq AK-p siulittaasua, Dina Olsen.

AK-p ilaasortami suliffimminni atugarisaat misissuiffigisareerpai. Pisortani sulisut amerlanerpaartaa­sa suliffimminni atugarisamik pitsaannginnerisa kingunerisaannik uippakajaartarneq misigisaraat mi­sissuinerit takutippaat. Voldgiftrettenip aalajangiinera iluatsillugu AK-p isumaqatigiinniar­nerni illua´tungerisamik pissusilersortarnerat suleriaasiallu eqqarsaatigilluareerlugit siunniuppaa aalajangiineq isumaqatigiinniarnissani atorluarumallugu. Sulisitsisut sulisumik atugarisaat pillugit ili­uuserisartagaat AK-p toqqissisimanartinngilluinnarpaa. Tamanna sulisorisat sulinerminni atugarisaan­nik paasinninnginnertut isigisariaqarpoq, AK-llu isumaqatigiinniarnissani tamanna Naalakkersuisunut erseqqissaatigissallugu siuttuuffigerusuppaa. ///